Геннадий Головкин 2026 жылы Қазақстанда қоштасу жекпе-жегін өткізуді жоспарлап отыр

Қазақстандық әйгілі боксшы Геннадий Головкин (42–2–1, 37 KO) 2022 жылдың қыркүйегінен бері рингке шықпағанына қарамастан, 2026 жылы туған жерінде соңғы жекпе-жек өткізу ниетін растады.

Asia Boxing ұйымының президенті міндетін атқарушы Пичаи Чунхаваджирамен кездесу барысында GGG ойын ашық жеткізді:

«Мен боксты жақсы білемін. Бокс — менің өмірім. Әрдайым көп еңбектендім. Иә, қазір 43-темін және әлі де бокстамын. Мүмкін, тағы бір жекпе-жек өткізгім келеді. Оны Қазақстанда өткізуді қалаймын», — деді Головкин.

Кейінірек, 2025 жылғы 27 желтоқсанда Эр-Риядта Криштиану Роналду қойған «Әлі де жұдырықтасасың ба?» деген сұраққа Геннадий жаңа жылда тағы бір рет рингке шығуға талпынып көретінін мәлімдеді. Сонымен бірге Головкин 2026 жылғы Бокс даңқ залына (IBHOF) енгізілді — сондықтан дәл сол жылы өтетін жекпе-жек оның мансабындағы ерекше нүкте болғалы тұр.

Мамандар Головкинге ең ықтимал қарсылас ретінде орта салмақтағы WBA чемпионы Эрисланди Лараны атайды. Кубалық боксшының жасы — 42-де. Жас айырмашылығының болмауы және чемпиондық белдік үшін айқас — Астана немесе Алматы аренасында нағыз «панчер мен технарьдың» классикалық дуэлін сыйлауы мүмкін.

Жағдайға қызығушылықты арттырып тұрған тағы бір жайт — Головкиннің қазіргі лауазымдары. Ол Қазақстан ҰОК президенті және World Boxing ұйымының маңызды мүшелерінің бірі. Сондықтан болашақ жекпе-жек — тек спорттық нәтиже ғана емес, сонымен бірге үлкен бедел сынағы.

Сонымен қатар, GGG қатысатын мүмкін қоштасу кеші ел үшін ірі имидждік жоба ретінде қарастырылуда: мұндай турнир Қазақстанға әлемдік жұлдыздарды тартып, туризм мен кәсіби бокстың дамуына жаңа серпін беруі ықтимал.